पोखरा फागुन २५,
श्री बाँस्थला गनगने र पँधेराखोला खानेपानी तथा सरसफाई उपभोक्ता समिति पोखरा १३ आर्वाको २०औं वार्षिक साधारणसभा शनिवार सम्पन्न भएको छ । साधारण सभाको उदघाटन गर्दै पोखरा महानगरपालिका वडानं १३ का वडा अध्यक्ष किरण बरालले खानेपानी वितरणका लागि आवश्यक पर्ने सम्पूर्ण पाईप तथा प्राविधिक लगायत सबैखालका सहयोगहरु वडा कार्यालयवाट उपलब्ध गराउने वताए ।
वडा अध्यक्ष बरालले मौजुदा खानेपानी अपुग हुने बित्तिकै लिफ्ट सिष्टमबाट नयाँ खानेपानी योजना सञ्चालन गर्ने वचन दिए । विकाश निर्माणमा आर्वा धेरै अगाडी बढी सकेको भन्दै वडा अध्यक्ष बरालले शिक्षा, स्वास्थ्य, खेलकुद,सडक निर्माण, खानेपानी लगायतको बिकाशमा आँफु लागिरहेको बताउँदै सबै उपभोक्ता ले आ– आफ्नो ठाउँबाट सहयोग गर्न आग्रह गरे ।
कार्यक्रममा समितिका संस्थापक अध्यक्ष नरबहादुर बरालले १७ वर्ष सम्म आफुले समितिको नेतृत्व गर्दा र उपभोक्तालाई खानेपानी खुवाउने सवालमा पाएको दुख हण्डर अनि अनुभव साट्दै उपभोक्ताको जिम्मेवारी नै महत्वपूर्ण रहने बताए । पत्रकार श्रीराम सिग्देलले खानेपानी समितीले उपभोक्ता जागरण कार्यक्रम सञ्चालन गर्नुपर्ने आवश्यकता औंल्याए । बाँस्थला गनगने र पँधेराखोला खानेपानी उपभोक्ता तथा सरसफाई समितिका अध्यक्ष बद्रीप्रसाद देबकोटाको अध्यक्षतामा भएको कार्यक्रममा समाजसेवी बसन्त शर्मा अधिकारी, जग्गादाता यमकुमारी बराल, अमरज्योती प्राबिका प्रअ बिमलबहादुर बराल, उपभोक्ता देबराज पौडेल , राधाकृष्ण बराल लगायतले शुभकामना मन्तव्य व्यक्त गरेका थिए ।
साधारण सभामा अध्यक्ष बद्रीप्रसाद देबकोटा द्वारा प्रस्तुत वार्षिक प्रतिवेदन तथा कोषाध्यक्ष मधु बरालले प्रस्तुत गरेको २०८०÷ ८१ को आय व्यय प्रतिवेदन सर्वसम्वत रुपमा पारित गरिएको थियो ।
सो अवसरमा लामो समयदेखि खानेपानी समितीमा रहेर महत्वपूर्ण योगदान पुरÞ्याएको भन्दै नरबहादुर बराल, घनश्याम बराल, साबित्री सिग्देल, कुलप्रसाद बराल, रुद्रनाथ बराल, राधाकृष्ण बराल, गोबिन्दप्रसाद बराल, र शकुन्तला परियारलाई सम्मान गरिएको थियो । कार्यक्रममा स्वागत उपाध्यक्ष राजनकुमार सिग्देलले तथा कार्यक्रमको सञ्चालन सदस्य मुक्ती बरालले गरेका थिए ।
झण्डै २ सय ८० उपभोक्ता रहेको सो खानेपानी समितिमा साविक आर्वा विजय गाविसका वडा नं २,३,४,५ र ६ वडाका उपभोक्ता सदस्य रहेका छन् भने करीब ८ किमी टाढाबाट खानेपानी ल्याई उपभोक्तालाई मिटर सिष्टम मार्फत पिउने पानी उपलब्ध गराईएको छ ।