पोखरा साउन १,
आन्तरिक राजस्व कार्यालय पोखराले अघिल्लो वर्षको तुलनामा ५१ करोड बढी राजस्व संकलन गरेको जनाएको छ । कार्यालयले आर्थिक वर्ष २०८१÷०८२ मा ६ अर्ब ८ करोड ४६ लाख रूपैयाँ राजस्व संकलन गरेको छ । आ.व. २०८०÷०८१ मा ५ अर्ब ५७ करोड ५९ लाख रुपैयाँ राजस्व संकलन गरेको थियो । यो अघिल्लो वर्षको तुलनामा ९ प्रतिशतले वृद्धि हो । आर्थिक वर्ष २०८१÷०८२ को वार्षिक लक्ष्य ७ अर्ब १९ करोड १७ लाख थियो । लक्ष भेटाउन नसकेपनि आ.रा.का. पोखरा ८५ प्रतिशत राजस्व उठाउन सफल भएको छ ।
आन्तरिक राजस्व कार्यालय पोखराले आर्थिक वर्ष २०८१÷०८२ मा आयकरतर्फ ४ अर्ब, मूल्य अभिवृद्धि करतर्फ १ अर्ब ८९ करोड ५९ लाख र अन्तः शुल्कतर्फ १८ करोड ४५ लाख राजस्व संकलन गरेको आन्तरिक राजश्व कार्यालय पोखराका प्रमुख कर अधिकृत शिव शर्माले जानकारी दिए । सहकारीमा समस्या, आर्थिक गतिशिलतामा सुस्तता भएकोले लक्ष्य अनुसारको राजस्व संकलन नभएपनि अघिल्लो वर्षको तुलनामा उत्साहजनक राजस्व संकलन भएको शर्माले वताए ।
आन्तरिक राजस्व कार्यालय पोखरा अन्तर्गत व्यवसायिक प्यानमा दर्ता हुने करदाताको संख्या ६८ हजार रहेको छ । जसमध्ये १२ हजार ५ सय करदाता मू.अ.करमा रहेको र व्यक्तिगत प्यान लिनेको संख्या २ लाख १० हजार रहेको समेत प्रमुख शर्माले जानकारी दिए ।

यसै विच आन्तरिक राजश्व कार्यालय पोखरामा आज देखि करदाता सहायता कक्ष सञ्चालन गरिएको छ । करदातालाई सहायता प्रदान गर्ने उद्देश्यले आर्थिक वर्ष २०८२÷०८३ को पहिलो दिन साउन १ गते देखि सञ्चालन गरिएको सहायता कक्षको एक कार्यक्रमका बिच कास्कीका प्रमुख जिल्ला अधिकारी रुद्रा देवी शर्माले उद्घाटन गरेकी छन् । आन्तरिक राजस्व कार्यालय पोखरा, पोखरा उद्योग वाणिज्य संघ, लेखनाथ उद्योग वाणिज्य संघ र जर्मन सरकारको स्वामित्वमा रहेको जी आई जेडको सहयोगमा उक्त करदाता कक्षको निर्माण गरिएको आन्तरिक राजश्व कार्यालय पोखराले जनाएको छ । करदाता सहायता कक्ष निर्माण भई सञ्चाजलनमा आएपछि करदातालाई सहयोग पुग्ने विश्वास लिईएको छ ।

तपाईंको प्रतिक्रिया दिनुहोस्

तपाईंको प्रतिक्रिया यहाँ लेख्नुहोस् ।
तपाईंको नाम यहाँ लेख्नुहोस् ।